അബുദാബി: റോഡുകളിൽ അപകടങ്ങൾ ഒഴിവാക്കുന്നതിനും പൊതുസുരക്ഷ ഉറപ്പാക്കുന്നതിനുമായി അപകടകരമായ ഡ്രൈവിംഗ് ശീലങ്ങൾക്കെതിരെ കർശന മുന്നറിയിപ്പുമായി അബുദാബി പൊലീസ്. വാഹനം ഓടിക്കൊണ്ടിരിക്കെ ഡോർ തുറക്കുക, സോഷ്യൽ മീഡിയയ്ക്കായി വീഡിയോ ചിത്രീകരിക്കുക തുടങ്ങിയ പ്രവൃത്തികൾ ഗുരുതര നിയമലംഘനങ്ങളാണെന്നും ഇവ മറ്റുള്ളവരുടെ ജീവൻ അപകടത്തിലാക്കുന്നതാണെന്നും അധികൃതർ വ്യക്തമാക്കി.
വാഹനം സഞ്ചരിക്കുന്നതിനിടെ ഡോർ തുറക്കുന്നത് മറ്റ് വാഹനങ്ങളുമായോ റോഡ് ഉപയോക്താക്കളുമായോ അപകടകരമായ കൂട്ടിയിടികൾക്ക് കാരണമാകാൻ സാധ്യതയുള്ളതിനാൽ ഇത്തരം പ്രവൃത്തികൾക്കെതിരെ കർശന നടപടി സ്വീകരിക്കുമെന്ന് പൊലീസ് അറിയിച്ചു. സോഷ്യൽ മീഡിയയിൽ വൈറലാകാൻ വേണ്ടി ചിലർ ചെയ്യുന്ന ഇത്തരം അപകടകരമായ പ്രവർത്തനങ്ങൾ ഒരാളുടെ മാത്രമല്ല, റോഡിലുള്ള എല്ലാവരുടെയും സുരക്ഷയെ ബാധിക്കുന്നതാണെന്നും മുന്നറിയിപ്പിൽ പറയുന്നു.
കനത്ത പിഴയും വാഹനം പിടിച്ചെടുക്കലും
മറ്റുള്ളവരുടെ സുരക്ഷ അപകടത്തിലാക്കുന്ന രീതിയിൽ വാഹനം ഉപയോഗിക്കുന്നവർക്ക് 2,000 ദിർഹം പിഴ, 23 ബ്ലാക്ക് പോയിന്റ്, 60 ദിവസത്തേക്ക് വാഹനം പിടിച്ചെടുക്കൽ എന്നിവ ഉൾപ്പെടെയുള്ള കർശന ശിക്ഷകൾ നേരിടേണ്ടിവരും. പിടിച്ചെടുത്ത വാഹനം തിരിച്ചെടുക്കാൻ 50,000 ദിർഹം വരെ ഫീസ് അടയ്ക്കേണ്ടിവരുമെന്നും അധികൃതർ വ്യക്തമാക്കി.
റോഡ് സുരക്ഷയ്ക്ക് പ്രാധാന്യം
അബുദാബി പൊലീസിന്റെ റോഡ് സുരക്ഷാ ബോധവൽക്കരണ പദ്ധതിയുടെ ഭാഗമായാണ് ഈ മുന്നറിയിപ്പ്. ഡ്രൈവർമാർ റോഡ് നിയമങ്ങൾ കൃത്യമായി പാലിക്കുകയും വാഹനമോടിക്കുമ്പോൾ പൂർണ ശ്രദ്ധ പുലർത്തുകയും വേണമെന്ന് അധികൃതർ അഭ്യർഥിച്ചു. അശ്രദ്ധയും അപകടകരമായ പെരുമാറ്റവും വലിയ ദുരന്തങ്ങൾക്ക് കാരണമാകാമെന്നും പൊലീസ് ഓർമ്മിപ്പിച്ചു.
