അബുദാബി: യുഎഇയിലെ തൊഴിൽ വിപണിയിൽ ജീവനക്കാരുടെ ജോലി മാറ്റം വർധിച്ചുവരുന്നതിനിടെ, ജോലി മാറുന്നതുമായി ബന്ധപ്പെട്ട നിയമങ്ങളിൽ കൂടുതൽ വ്യക്തത വരുത്തി മാനവവിഭവശേഷി-സ്വദേശിവൽക്കരണ മന്ത്രാലയം (MOHRE). റീട്ടെയിൽ, ഹോസ്പിറ്റാലിറ്റി, കൺസ്ട്രക്ഷൻ, ടെക്നോളജി ഉൾപ്പെടെയുള്ള മേഖലകളിൽ കരാർ കാലാവധി കഴിഞ്ഞ് പുതിയ ജോലിയിലേക്ക് മാറുന്ന ജീവനക്കാർക്ക് നിലവിലെ നിയമങ്ങൾ കൂടുതൽ സൗകര്യപ്രദമാണെന്ന് മന്ത്രാലയം വ്യക്തമാക്കി.
2021-ലെ ഫെഡറൽ ഡിക്രി-ലോ നമ്പർ 33 പ്രാബല്യത്തിൽ വന്നതോടെ പഴയ “ലേബർ ബാൻ” സംവിധാനം വ്യാപകമായി ഒഴിവാക്കിയിരുന്നു. ഇതോടെ ഭൂരിഭാഗം ജീവനക്കാർക്കും മുൻ തൊഴിലുടമയുടെ ‘നോ ഒബ്ജക്ഷൻ സർട്ടിഫിക്കറ്റ്’ (NOC) ഇല്ലാതെയും പുതിയ ജോലിയിലേക്ക് മാറാൻ സാധിക്കുന്ന സാഹചര്യം രൂപപ്പെട്ടു.
തൊഴിൽ കരാർ കാലാവധി പൂർത്തിയാകുകയോ, തൊഴിലുടമയും ജീവനക്കാരനും തമ്മിലുള്ള പരസ്പര ധാരണ പ്രകാരം കരാർ അവസാനിപ്പിക്കുകയോ ചെയ്താൽ ജോലി മാറ്റം നിയമപരമായി അനുവദനീയമാണ്. എന്നാൽ നോട്ടീസ് പീരിയഡ് പൂർത്തിയാക്കുകയും നിലവിലെ വർക്ക് പെർമിറ്റും റെസിഡൻസി വിസയും നിയമാനുസൃതമായി റദ്ദാക്കുകയും വേണം.
മിക്ക സാഹചര്യങ്ങളിലും ഇനി NOC നിർബന്ധമല്ലെങ്കിലും, പ്രൊബേഷൻ കാലയളവിലോ കരാറിലെ പ്രത്യേക വ്യവസ്ഥകളിലോ ചില നിബന്ധനകൾ ബാധകമായേക്കാമെന്ന് മന്ത്രാലയം ചൂണ്ടിക്കാട്ടി.
അതേസമയം, നോട്ടീസ് പീരിയഡ് പാലിക്കാതെ ജോലി ഉപേക്ഷിക്കുന്നവർക്ക് നിയമനടപടികളും സാമ്പത്തിക പിഴകളും നേരിടേണ്ടി വരാം. ഗുരുതരമായ തൊഴിൽ നിയമലംഘനങ്ങൾ ഉണ്ടെങ്കിൽ ഒരു വർഷം വരെ വർക്ക് പെർമിറ്റ് നിരോധനവും (Labour Ban) ഏർപ്പെടുത്താൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി.
ജോലി രാജിവെച്ച ശേഷം യുഎഇയിൽ തുടരുന്നതിനായി ജീവനക്കാർക്ക് ‘ഗ്രേസ് പീരിയഡ്’ ലഭിക്കും. വിസയുടെ വിഭാഗം അനുസരിച്ച് 30 ദിവസം മുതൽ ആറുമാസം വരെയാണ് ഈ കാലാവധി. ഈ സമയത്തിനുള്ളിൽ പുതിയ ജോലി കണ്ടെത്തുകയോ, വിസ സ്റ്റാറ്റസ് മാറ്റുകയോ, രാജ്യം വിടുകയോ വേണം.
പ്രൊബേഷൻ കാലയളവിൽ ജോലി മാറാൻ ആഗ്രഹിക്കുന്ന ജീവനക്കാരൻ തൊഴിലുടമയ്ക്ക് എഴുത്തുപരമായ നോട്ടീസ് നൽകേണ്ടതുണ്ട്. ചില കേസുകളിൽ പുതിയ തൊഴിലുടമ, പഴയ തൊഴിലുടമയുടെ റിക്രൂട്ട്മെന്റ് ചെലവുകൾ വഹിക്കേണ്ട സാഹചര്യമുണ്ടാകാം.
വിസ ട്രാൻസ്ഫർ നടപടികളിൽ ആദ്യം പഴയ വർക്ക് പെർമിറ്റും റെസിഡൻസി വിസയും റദ്ദാക്കും. തുടർന്ന് പുതിയ കമ്പനി പുതിയ വർക്ക് പെർമിറ്റിനായി അപേക്ഷ സമർപ്പിക്കും. ഇൻ-കൺട്രി സ്റ്റാറ്റസ് ചേഞ്ച്, മെഡിക്കൽ പരിശോധന, എമിറേറ്റ്സ് ഐഡി നടപടികൾ പൂർത്തിയാക്കിയ ശേഷമാണ് പുതിയ റെസിഡൻസി വിസ അനുവദിക്കുക. സാധാരണയായി ഈ നടപടികൾക്ക് രണ്ട് മുതൽ നാല് ആഴ്ച വരെയാണ് സമയമെടുക്കുന്നത്.
ജീവനക്കാരുടെ അവകാശങ്ങൾ സംരക്ഷിക്കുന്നതിനൊപ്പം അന്താരാഷ്ട്ര പ്രതിഭകളെ ആകർഷിക്കാനും യുഎഇ തൊഴിൽ വിപണിയെ കൂടുതൽ സുതാര്യവും മത്സരക്ഷമവുമാക്കാനുമാണ് പുതിയ തൊഴിൽ നിയമപരിഷ്കാരങ്ങളുടെ ലക്ഷ്യമെന്ന് മന്ത്രാലയം വ്യക്തമാക്കി.
