അബുദാബി: യുഎഇയിൽ ഇത്തവണ ബലിപെരുന്നാളിനോടനുബന്ധിച്ച് ദീർഘ അവധിക്ക് സാധ്യതയുള്ളതായി റിപ്പോർട്ടുകൾ. ജ്യോതിശാസ്ത്ര കണക്കുകൾ പ്രകാരം ജൂൺ 27നാണ് ബലിപെരുന്നാൾ ആരംഭിക്കാൻ സാധ്യതയെന്ന് എമിറേറ്റ്സ് അസ്ട്രോണമി സൊസൈറ്റി അറിയിച്ചു. ഇതനുസരിച്ച് അറഫാ ദിനം ജൂൺ 26നായിരിക്കും.
ചന്ദ്രദർശനത്തിന്റെ അടിസ്ഥാനത്തിലായിരിക്കും ഔദ്യോഗിക പ്രഖ്യാപനം ഉണ്ടാകുക. എന്നാൽ നിലവിലെ കണക്കുകൾ പ്രകാരം പൊതുമേഖല-സ്വകാര്യ മേഖല ജീവനക്കാർക്ക് ആറുദിവസം വരെ തുടർച്ചയായ അവധി ലഭിക്കാമെന്ന പ്രതീക്ഷയിലാണ് പ്രവാസികൾ.
അറഫാ ദിന അവധിയും മൂന്ന് ദിവസത്തെ ബലിപെരുന്നാൾ അവധിയും കൂടാതെ ശനി-ഞായർ വാരാന്ത്യ അവധിയും ചേർന്നാൽ ദീർഘ വിശ്രമം ലഭിക്കും. ജൂൺ 25ന് അധിക അവധി എടുക്കുന്നവർക്ക് ഒമ്പത് ദിവസത്തോളം നീളുന്ന അവധി ആസ്വദിക്കാനാകും.
ദീർഘ അവധി മുന്നിൽ കണ്ടുകൊണ്ട് നിരവധി പ്രവാസികൾ ഇതിനകം യാത്രാ പദ്ധതികൾ തയ്യാറാക്കിത്തുടങ്ങി. ജോർജിയ, അസർബൈജാൻ, അർമേനിയ, മാൽഡീവ്സ്, തായ്ലൻഡ്, ശ്രീലങ്ക തുടങ്ങിയ രാജ്യങ്ങളിലേക്കാണ് കൂടുതൽ ബുക്കിംഗുകൾ നടക്കുന്നതെന്ന് ട്രാവൽ ഏജൻസികൾ അറിയിച്ചു.
വിദ്യാഭ്യാസ മേഖലയിലും ഇത്തവണ വലിയ ആശ്വാസമാണ്. മിഡ്-ടേം ബ്രേക്ക് പെരുന്നാൾ അവധിയോടൊപ്പം വരുന്നതിനാൽ വിദ്യാർത്ഥികൾക്കും അധ്യാപകർക്കും ദീർഘ അവധി ലഭിക്കുമെന്ന പ്രതീക്ഷയിലാണ്.
